< <

<

(Nesr)

Nurmuhemmet Yasin Orkishi

mundaq bir hékmetlik söz bar: "ümidsiz kishiler bu dunya sansiz tam - tosaqlardin terkib tapqan deydu. ümidwar kishiler bolsa bu dunya nurghun tam - tosaq we chiqish ishikidin terkib tapqan deydu." méningche, pelsepe nuqtisidin bu intayin toghra éytilghan sözdur. biraq hayatni heqiqiy chüshen'güchi kishiler üchün éytqanda, bu dunyada tam - tosaqmu, chiqish ishikimu mewjut emes. chünki ularning neziride ? biz özimizge nurghunlighan tam - tosaqlarni quruwalimiz. hayatni qesten qiyinlashturuwalimiz. yene ashu tam - tosaqlardin etey özimizni qachurimiz. chiqish ishiki izdeymiz. lékin bu tam - tosaqlarning kallimizdila mewjut ikenlikini, uni özimiz shekillendürüp etey yashash yolimizni qiyinlashturuwalghanliqimizni bilmeymiz. emeliyette köz aldimizda tam - tosaqbar dep qarisaq, u heqiqeten köp. eger chiqish ishiki bar dep qarisaq, heqiqeten nurghun ishik bar. lékin bulardin bir ömür ötüp bolghili bolmaydu. yene kélip bu ishiklerning hemmisi ghelibe ishiki bolushi natayin.

melum bir ishni qilmaqchi, melum bir yerge barmaqchi, melum birnersige érishmekchi bolsaq, biz aldi bilen shu ishning özini qilmastin eksiche yaxshi - yaman dep nurghun tereplirini shekillendürüwalimiz. özimizge nurghun tam - tosaq ishiklerni quruwélip aldi bilen shularni izdeymiz. netijide ezeldin yoq bolghan nurghun awarichiliq, qiyinchiliqlar özlükidin peyda bolidu. hetta bezide ashu ishiklerdin ötelmey qalarmizmikin dep shu ishqa nisbeten özimizde qorqunch peyda qiliwalimiz. netijide shu ishni bashlimay turupla meghlup bolimiz. bizni meghlup qilghini hergizmu shu ishning qiyinliqi yaki tosaqlarning köplüki emes, belki özimizdin halqip kételmigenlikimizdur. mahiyette bizning ötmekchi bolghinimiz del idiyimizdiki qashangliq. mubada bir ishqa qedem qoyghanda özimizni hemmidin muhim dep qarisaq, tosaqlarning ornigha özimizni yaki qilmaqchi bolghan ishni qoysaq, bu dunyada özimiz yaki qilmaqchi bolghan ishimizla mewjut bolidu. héchqandaq cheklime qalmaydu. tewsiyem shuki, herqandaq ishni qilmaqchi bolsingiz özingizge cheklime qoymang. hergiz aldimda tam mewjut dep oylimang. tosulup qalmighuche hergizmu aldinala ishik izdep aware bolmang. shundaq qilsingizla ishingizda menggü ghelibe qazinalaysiz. shundaq qilsingizla menggü özingizdin halqip öteleysiz.


("Tengritagh" 2003-yilliq 4-sanidin)